លុយពិតជាមានតម្លៃ តែកុំស្មានថាអាចទិញចំណុច៥យ៉ាងនេះបានដោយងាយឲ្យសោះ!
12-January-2016 | ដោយ មួយឡា
មនុស្សមួយចំនួនបានផ្តល់តម្លៃលើទឹកលុយយ៉ាងខ្លាំង ហើយតែងពោលពាក្យថា ឲ្យតែមានលុយ គឺមានអ្វីៗទាំងអស់ ឬ អាចប្រើខ្មោចឲ្យកិនម្សៅបាន។ ថ្វីត្បិតតែភាពជាក់ស្តែងលុយពិតជាសំខាន់ ក្នុងជីវិតប្រចាំថ្ងៃមែន ប៉ុន្តែមិនមែនមានន័យថា មានលុយ គឺអាចធ្វើអ្វីៗគ្រប់យ៉ាងនោះទេ។
ខាងក្រោមនេះ ជាចំណុចសំខាន់ៗដែលលុយមិនអាចទិញបានដោយងាយឡើយ៖
១. កេរ្តិ៍ឈ្មោះ និង កិត្តិយស៖ កេរ្តិ៍ឈ្មោះ និង កិត្តិយស គឺបានមកដោយសកម្មភាពល្អៗរបស់អ្នក ដែលធ្វើឲ្យអ្នកដទៃគេផ្តល់តម្លៃ ដែលលុយមិនអាចយកមកទិញបានឡើយ។ ដូច្នេះ សូមកុំប្រឡំថា អ្នកអាចយកលុយមកទិញបានឲ្យសោះ ហើយទោះបីជាទិញបាន តែវាគ្រាន់តែជារបស់លម្អខាងក្រៅប៉ុណ្ណោះ គឺគ្មានតម្លៃអ្វីទេ។
២. សេចក្តីស្រលាញ់ពិតប្រាកដ៖ សេចក្តីស្រលាញ់ពិតប្រាកដ គឺមានតម្លៃ និង ទំហំធំធេងណាស់ ដែលមិនអាចយកលុយមកទូទាត់ ឬ ទិញដូរបានឡើយ។ ប្រសិនបើអ្នកបានសេចក្តីស្រលាញ់តាមរយៈការប្រើលុយ នោះវានឹងរលត់ទៅវិញយ៉ាងរហ័សបំផុត នៅពេលអ្នកអស់លុយ ព្រោះអ្វីៗវាគ្រាន់តែជាការសម្ដែងដើម្បីលុយរបស់អ្នកប៉ុណ្ណោះ។
៣. សុខភាព៖ ថ្វីត្បិតតែអ្នកមានលុយ អាចប្រើប្រាស់ដើម្បីព្យាបាលជម្ងឺនៅពេលមានបញ្ហាសុខភាព ប៉ុន្តែសូមកុំយល់ថា លុយអាចទិញសុខភាពរបស់អ្នកបានឲ្យសោះ។ បើចង់បានសុខភាពល្អ គឺ ត្រូវតែព្យាយាមថែរក្សា តាមរយៈការហាត់ប្រាណ បរិភោគអាហារត្រឹមត្រូវ និង គេងឲ្យបានគ្រប់គ្រាន់ជាដើម។ បើអ្នកមិនបានព្យាយាមថែរក្សាសុខភាព ហើយចាំតែយកលុយទាំងដុំៗ ដើម្បីទៅព្យាបាលជម្ងឺនោះ វាជារឿងខុសឆ្គងមួយ ព្រោះកង្វះការថែទាំសុខភាព អាចធ្វើឲ្យអ្នកមានជម្ងឺធ្ងន់ធ្ងរ ហើយអាចស្លាប់បាន ដោយលុយមិនអាចជួយបានអ្វីឡើយ ព្រោះគ្រូពេទ្យក៏មិនអាចសង្គ្រោះជីវិតមនុស្សបានគ្រប់គ្នាដែរ។
៤. សុភមង្គលគ្រួសារ៖ ថ្វីត្បិតតែលុយជាចំណែកសំខាន់មួយ ដែលជួយឲ្យគ្រួសារមានសេចក្ដីសុខ និង សុភមង្គលនោះ ប៉ុន្តែវាមិនមែនមានន័យថា អាចយកលុយតែម្យ៉ាងដើម្បីបង្កើតសុភមង្គលរបស់គ្រួសារនោះឡើយ។ សំខាន់បំផុត វាកើតចេញពីការយោគយល់ ការអធ្យាស្រ័យ ភាពស្មោះត្រង់ និង ការស្រលាញ់គ្នាទៅវិញទៅមក ដូច្នេះបើអ្នកគិតថា លុយវាសំខាន់ជាងចំណុចទាំងនេះ នោះអ្នកនឹងបាត់បង់គ្រួសារដ៏ល្អមួយមិនខាន ដោយសារតែការផ្តល់តម្លៃឲ្យលុយហួសហេតុពេក។
៥. ភាពជោគជ័យក្នុងជីវិត៖ ជោគជ័យពិតប្រាកដក្នុងជីវិត គឺជាការសម្រេចតាមបំណង ឬ គោលដៅរបស់ខ្លួន ក្នុងការធ្វើអ្វីមួយ។ ភាពជោគជ័យនេះ វាត្រូវតែកើតចេញពីចិត្តអំណត់ ការតស៊ូជំនះរាល់ឧបសគ្គដោយកណ្តាប់ដៃរបស់អ្នក។ ដូច្នេះហើយសូមកុំគិតថា យកលុយទៅទិញភាពជោគជ័យបានដោយងាយឲ្យសោះ ទោះបីជាបាន តែវាមិនមែនជាភាពជោគជ័យពិតប្រាកដ ឬ ស្ថិតស្ថេរនោះឡើយ៕
ប្រភព៖ goodereader.com , bizkhmer
ចំនួនអ្នកទស្សនា
- ថ្ងៃនេះ791
- ម្សិលមិញ3741
- សប្តាហ៍នេះ9321
- ខែនេះ29391
- ឆ្នាំនេះ365651
- សរុប19593097